Lyrics

കറുത്തരാവിന്റെ കന്നിക്കിടാവൊരു
വെളുത്ത മുത്ത്
കടൽകടന്നും കണ്ണീർകടഞ്ഞും
പിറന്ന മുത്ത്
വെളുത്തമുത്തിനു തണല് നൽകാൻ
നീലക്കുടയുണ്ട്
വെളുത്തമുത്തിനു കിടന്നുറങ്ങാൻ
വെളിച്ചപ്പൂവുണ്ട്

വെളിച്ചപ്പൂവിനു തപസ്സിരുന്നു
താമരപ്പെണ്ണ്
താമരപ്പെണ്ണിന് താലി പണിയാൻ
താരകപ്പൊന്ന്
പൊന്നുരുക്കി പൊന്നുരുക്കി പൂനിലാവാക്കീ
എന്നിട്ടും മാനത്തെ മുത്തുക്കുടത്തിന്റെ കണ്ണുതുറന്നീലാ
(കറുത്തരാവിന്റെ...)

കണ്ണു തുറന്നപ്പോൾ അന്തിപ്പെണ്ണിനെ
കണ്ടു മോഹിച്ചു
വിണ്ണിന്റെ തീരത്തെ വീട്ടിലേക്കവൻ
കുതികുതിച്ചൂ
കുതിച്ചുചെന്നപ്പോൾ ഇരുളിൻ കൂരയിൽ അവളൊളിച്ചു
മദിച്ചുവന്നൊരു മുത്തോ കടലിൻ
മടിയിൽ വീണു
(കറുത്തരാവിന്റെ...)